תהלים יב

1 למנצח על-השמינית מזמור לדוד.
2 הושיעה יהוה כי-גמר חסיד כי-פסו אמונים מבני אדם.
3 שוא ידברו איש את-רעהו שפת חלקות בלב ולב ידברו.
4 יכרת יהוה כל-שפתי חלקות לשון מדברת גדלות.
5 אשר אמרו ללשננו נגביר שפתינו אתנו מי אדון לנו.
6 משד עניים מאנקת אביונים עתה אקום יאמר יהוה אשית בישע יפיח לו.
7 אמרות יהוה אמרות טהרות כסף צרוף בעליל לארץ מזקק שבעתים.
8 אתה-יהוה תשמרם תצרנו מן-הדור זו לעולם.
9 סביב רשעים יתהלכון כרם זלות לבני אדם.